Hnathawh Kawr

Krismas leh kumthar ruai ṭheh leh zai tui a liam a, a lunglêng zualte khuang khatin an zai tleng tleng chauh tawh a, a pianna lam hla phei chu tuman châng khat pawh an sa peih tawh lo. Ruai sa chhumna hârte chu an lang ṭhing deuh ṭhiap tawh a,  vut leh thingthu kâng bâng ârin a thai darh niai te chuan Krismas lo thleng leh tûr chu dam rei nghah thil a ni tih min hriattir a.  Thlasik khaw vawt chu ṭhâl ruah sûr zeuh chuan a rawn belh a, tang a han thâwm leh rih a.  Krismas boruak ngaiin han thlir lêt  dâwn ila awmzia a nei tawh si lo, hma lam han thlir dâwn ila rilru leh taksain a la peih meuh bawk si lo. He tih lai vêl boruak hi a nawm dân a laklawh ṭhin ngawt mai!

Krismas kawr aiah hnathawh kawr:  Kum thar zawh Pathianni hmasa ber a han liam meuh chuan thingtlang pa ho tî-tî a inthlâk ṭan a, Thanpuii pa vaihlo tuizia te, Aizawlah hmarcha ro hralh a nawmzia te  sawi pahin kumin  lo neih tûr mau hmun vah nân khawchhak chem hriam lei tûr a awm thute chu tî-ti tlânglâwn a ni ta.  Zing ni chhuak hnung puak zâwngin lungtât an han kapkalak a, tui novah tui an han chhawp sauh sauh a, khawchhak chem thar ngei mai kha tle vawr khawpa hriamin patlingin an han tât a, ni ênga an hlimthla phe zoh zoh khawpin an chem tât an han su nghoh nghoh mai chu  hmuhnawm a tling ṭhin a ni! Chutah Krismas hma deuha Zupâwl tuam ṭuma an hâk hnuhnun ber, an hnathawh kawr vawt khawng iaih tawh kha an han thing phawrh phawrh a, inhmeh êm êmin an han ha leh ta zân mai le! 

Chu hnathawh kawr chu:  He hnathawh kawr chanchin hi a nia ka sawi duh tak chu ni!  Tual-tah dik tak, a tirah chuan a vâr, tunah erawh chuan a vâr aiin a uk lam a pâwl mah tawh a, hmun thenkhat laiah phei chuan a ṭial emaw tih mai theihin thing hnai leh reh thei lo dangten an ṭial mawi hle tawh a. A kawr hmalam hnuai deuh hlekah hian ipte pahnih a awm a, a ipte vei lam phei chu a peh deuh nual tawh.  A tira kawrkilh (keptê) invuah kim ve ṭhap kha tûnah chuan pathum chiah a awm tawh a, a hatu erawh chuan chu chu ngaimawh êm êm âwm pawhin a lang hlei lo va!. 

Chu hnathawh kawr chu a bân tlâwn (tluan) a ni na a, a bân  hmâwr ve ve chu tih luih ni si lo hian an hniar sung tawh a. A ban kiu lai chu a ṭet ve ve tawh bawk a, a bân dinglam erawh chu Favâng awllên lai khan an bel tawh avangin a la phui ṭha hle thung.  A nghâwng chu a balh êm êm vâng pawh ni lovin a khâk bel tlat tawh a, sûk leh sûk loh thuhmun rengin a rawng chu a inthlâk ve mai mai ngai tawh hek lo.

He hnathawh kawr hi a rim hle a, Pathian ni leh ni bik tê tih chauh lovah chuan kâwla ni chhuak chhiarin a thawk chhuak ṭhin a.  Fûr leh ṭhâl, a sûr a sa hnuaiah rinawm takin a hatu hi a  ṭawiâwm tluan chhuak zak ṭhin. Vahsân lâk aṭangin Pâwltlâk thlengin âwl tih ni rêng a nei ngai lo. He hnathawh kawr hian hmun tin hmun tang a fang chhuak tawh ṭhin a, Leithûm ram aṭanga  Mauhâk ram thlengin fan loha ram pawh a nei tawh lo.  Fan phâk china lui dung zawng zawng zawh chhuakin, ngaw dur leh phul pik tam tak a lo tâwn tlang tawh bawk a ni. 

Tuisik leh sahbawn aiin thlan tuiin a chiah hnem zâwk a,  rimtuina aiin rinawmna a thlang zâwk ṭhin.  A hmêlah mawina rêng rêng a nei lo va, a pian tirh ata tuman " a va mawi êm " tiin an la fak chhin eih bawk hek lo.  Amah nâwt mâm tûrin Istiri a la tawng ngai lo va, phuh rimtui tûrin eng ‘perfume’ mah a la hnimhnai chhin  hek lo.  Khawpuia a kal chângte leh changkânna hmun deuhah chuan a rawng leh a zia te chu han thlâk ve deuh nual ṭhin mah se tuman nalh leh mawi tiin an fak ngai chuang lo va, mite duh leh ngainat a hlawh phah sawt chuang hek lo.

Hlawhtlinna thlentu-Hnathawh Kawr!  Thil mak tak mai chu heihi a ni: He hnathawh kawr hi a ngainatu apiang leh a ha ngun apiangte tân hlawhtlinna thlentu zu ni tlat a!  Amah hian malsâwmna a keng tel ve hrim hrim emaw tih tûrin a ngainatute chu tlakchhamna lakah a vêng ṭhin a, thawhrimna hi a thupui a nih avangin mi mâwl leh zir sâng vak lote pawhin an lo dinchhuahpui tawh thin a, an  dinchhuahpui mêk zêl bawk.  Chhût miten an han chhût chian phei chuan he hnathawh kawr ngei mai hi mimal chauh pawh ni lo, chhûngkua leh ram dinchhuahna bul tumtu pawh a lo ni reng a ni tih an hmuchhuak a ni.

Ṭhangtharten an zahpui em ni?  He hnathawh kawr hi a tlâwma a lan changkân loh êm avâng hian tunlai ṭhangthar tam takte hmuhsit leh zahpui a tâwk mêk  niin an sawi a, tak tak ni maw? Pâwn lam lan dân leh thawmhnaw hâk aṭang ringawta mite ‘judge’ ṭhin tan chuan hriatthiam a har êm rêng a ni. Thawmhnaw ropui leh man to ber ber ha apiang hi mi ropui leh ngaihsânawm an ni kher lo tih hre tûrin an kumin a la pha lo te pawh a ni mahna.

A hmêl enin tlâwm hle mah se chhûngril lama a ropuizia ka hmu a; khawvêl mi ropui zawng zawngte pawhin an lo hâk ṭhin a ni tih han hriat phei chuan he hnathawh kawr hi a ha vêtu nih ringawt pawh inchhuanna tham a lo ni reng mai. A mizia leh nihna hi Siamtu rîlrem zâwng tak mai a lo ni leh zêl bawk nên, kei zawng he hnathawh kawr hi ka ngaisâng lo thei lo a ni e.