Pa Chhe Kum Tiam Leh New Year Resolutions!

Kum thar 2012 chu a lo thleng leh dawn ta reng mai!  Kum 1-in kan upat belh leh dawn! Kum thar lo her chhuak leh thin hi nula /tlangval leng rei tan chuan lawmna leh  lawm lohna a inbuk tawk thial thin awm e! "Nupui hi nei ve tawh la" tih ri leh "Pasal neih hi i tum na nge?" tih zawhna chhan chakawm lo tak tak kha kum  lo thar hian  a titam sawt thin ni te pawhin a lang!  Naupan laiin upat thuai thuai kan chak a, kum a lo thar chiaha upa ta sawta han inhriat te kha nuam ve tak a ni!  Nupui pasal neih hmaa a naupang thei ang bera insawi thin pawh kha tar kun khup biha an han dam meuh chuan an kum bak baka insawi upat an tum leh si thin a nih hi! Mihring tak hi chu...

Kum hlui thlah:  Tleirawl chhuah tirh lai vela kum hlui thlah te kha a va lo nuam mai mai thin em!  Star deuh te nei ru ve ran chung khan biak pawh kan be ngam si lo! Thian za ho ti ti khawm naah kan han inhrosa ve a, "Kum hlui thlah zan chu ka tawm fal  pui hrim hrim!" kan han ti ve tan tan a, a hun a lo thlen meuh chuan  huaisennain a tlin leh lo bakah,  hmeichhe tawm fal pui tur chuan a hmeichhia khan a remtih ve loh chuan a theih mai loh tih te chu practical-in kan han zir chhuak chho ve a! Zahzelah tingtang hrui kim lo hmangin  Love song kan hriat ang ang pawr fe fein kan han sa ve leh ngawt a! Ni danga zu in ngai hlei lo khan zu in kan han chak ve teh tlat a!  U  te zarah a nam tawk leka lem tur kan han tawng fuh ve te chuan kum hlui thlah zan chu a tinuam zual a, sikul lama "May I come in sir?" tih bak Saptawnga kawi khat mah tawng thei lo kha he kum hlui thlah zanah na na na hi chuan Saptawng kan va thiam tak em!

Kum hlui ni hnuhnung ber ni tla tur thlir liam te hi thenkhat chuan sakhua tlukin an ngai pawimawh a, kum kal ta chhunga an sualna zawng zawng leh an dawt sawi zawng zawngte kha ni chuan tlakpui se tia duhthusam pahin, a tuk kum thar ni lo chhuak chuan engtin emaw tak thil tha rawn thlen tura beisei chungin mit vai rum rumin ni chu an thlir liam thin a ni mah na! Kei pawh vawi engemaw zat chu hetiang hian ka thlir liam ve tawh a, ka thlir liam urhsun ang huin ka hlawkpui em em awm pawh ka hre hlei law!  A thlir dan bik riau keini ang duang man phak loh thil te pawh a awm a ni mahna! Ka hlawkpui vena ber erawh chu Pathian hnena lawmthu sawina hun remchang tak niin ka hria a, chu erawh chu ni tla tur thlir liam kher lo pawhin ka ti mai thin.

Kum thar thutiam (New Year resolutions):   Hei mawlh mai hi ka ngai pawimawh ve thin!  Zuk leh hmuam bansan te, inkhawm taihmak ve deuh tawh te, sual loh ve deuh tawh te, lehkha zir peih deuh tawh tur tein ka intiam ve fo thin.  Kum hlui zanlai dar 12 a han rik chiaha ka sahdah, meizial leh nawalh rel tukverha ka thlawh chhuahtir kum te kha ka theihnghilh thei ngai tawh lo! A tuk kum thar ni tlai lamah a thar ka lei leh vek tih te thleng khan ka la hre reng thin! Kumin kum thar chu Diary ka ziak ve char char tawh ang tiin Diary bu te kan han lei ve a, January ni 1 niah chuan uluk em emin, kan kum thar ruai sa talh zat te nen lam kan han ziak ve thlap a! Kan Star te chungchang pawh ziah zeuh zeuh chak tak chungin thianten  kan Diary min lo chhiar ruk sak ang tih hlauin kan ziak tha ngam lo vel!  January thla a han ral meuh chuan kan Diary phekah chuan 'pending' a awm ta zeuh zeuh a, March thla vel atang phei chuan chawlhkar tawpah ziak turin kan han thu peih hram a, Thawhtannia kan thil tih kan han ziak tan a, Thawhlehni leh Nilainia kan thil tih chu kan han hriat pawlh leh tlat a, a tawp lamah phei chuan ni khata kan  thil tih chu tlar hnih khat lekin kan ziak zo leh ta zung zung mai a ni!  Kum chanve a kan liam meuh chuan kan Diary chu a thla a thlain a 'blank' ta thluah mai thin a, a tawp atawpah chuan a pum puiin kan bansan leh nge nge thin! Hetiang vel hi ka nia kei chu...ka 'new year resolution'  ve hi chu pa chhe kum tiam ang maiin hlawkpui nan ka la hmang ve hlei thei lo a ni e!

Chuvangin, tun kum thar  2012 chu eng 'resolution' mah ka siam dawn lo tih hi ka ' resolution' chu a ni mai!. Mahni intiam vak vaka tihhlawhtlin  leh theih si loh ai chuan, kan thil tih duh chu intiam kher lovin ti mai ila,  kan tih duh loh pawh ti lo mai ila...tih hi ka intiamna ni lovin ka thutlukna a ni e!

Krismas Lunglen

Krismas a hnai tawlh tawlh a, rilruin Bethlehem lam ai mahin kan naupan laia kan chenna thingtlang khaw chengker leh khaw mawngping zet mai kha a chhui kir a, pan lai hun ngaiin lung hlui a leng veng veng mai a nih hi maw!!
Khang hun lai chanchin te kha han ziak dawn ila, khawi atanga tan tur nge tih pawh hriat a har bakah tu khawkhain min hlutpui kher lo ang a, tunlai thangthar zawkte chuan kan sawi awmzia pawh an man pha meuh ang em?  Tlangsam kuhmuh hun atangin  kan urlawk tan tawh a,  a han par tan chiah tawh phei chuan Krismas a hnai tawh a ni tih tuma hrilh kan ngai tawh lo! Sikul chawlh a lo intan a,  rilru thawveng em emin khua han hawi vel ila, ralkhata thlawhhmate chu buhvui hmin tan tawh chuan a ti eng tuk mai a, ral lehlam mual zawng zawng chu Nihawi (Bawngpu pangpar) chuan a bawh eng tuar mai bawk a, serthlum hmin eng tuar mai leh Zawngtah bilhbawlawk lo ther fur tawh mai te chuan thinlung hi a chawk phur mai ni lovin kan helhhawlh a ni ber e!
Sawi zel dawn ila, sawi sen a ni si lo! Krismas lo thleng tur rilrua hisap neuh neuh chunga sava veh te, Thangthleng leh Beai thang kam te,  Tlangsam bawh en te, Khawmhma rah thur tak tak lak te, Krismas thing phurh te, chhang funna tur Changel hnah lak te, chhang dena a mawngkhak inchuh te, Krismas kawr thar te, hmui rep leh ke chat te, halpuah leh baloon te….
Masi sial mawlh kha!  Kan khaw tlangval leh pa ho thenkhatin Krismas hmann tur sial khawchhak lam atanga an han lak/kaih  tum mawlh kha a va hlimawm em! An lo thlen dawn ni chuan kawtchhuahah nunau hovin kan lo hmuak a,  sial pa tuai a sa tui tawk vel tur hi haw-haw chungin an rawn kai ta ruau ruau mai le!    Chutah tlangval ho chuan mipa naupang thenkhat chu an se kaihna hrui hmawrah min han chelh tir ve a, kan va intithei tak em!! Vaivut chhir khu rum rum leh haw-haw chungin khuaah kan han chaih lut a… A sa a tui vak lem loh teh lul nen, a lang ropui ve hrim hrim khan min tiphur a ni awm e!
Khang hun lai te khan khuarei chang tawh mahse, a hun a lo thlen leh meuh hi chuan lunglen a kai tho leh si thin! 
Amah Pu Rokunga pawhin,
“Kum pui sul a lo vei chang hian lunglen a tho leh thin,
Ngai lo leh lawm lo reng hi awm hlei lo;
Kan ngaih Krismas ni eng a lo zam thar leh ta,
A mawi tizuala’n Bethlehem par nen,
A lo vul ta e, par ang kan lawm”,   a lo ti mawlh mawlh reng a nih hi!  A inhmehin a va dik em!