Kum thar 2012 chu a lo thleng leh dawn ta reng mai! Kum 1-in kan upat belh leh dawn! Kum thar lo her chhuak leh thin hi nula /tlangval leng rei tan chuan lawmna leh lawm lohna a inbuk tawk thial thin awm e! "Nupui hi nei ve tawh la" tih ri leh "Pasal neih hi i tum na nge?" tih zawhna chhan chakawm lo tak tak kha kum lo thar hian a titam sawt thin ni te pawhin a lang! Naupan laiin upat thuai thuai kan chak a, kum a lo thar chiaha upa ta sawta han inhriat te kha nuam ve tak a ni! Nupui pasal neih hmaa a naupang thei ang bera insawi thin pawh kha tar kun khup biha an han dam meuh chuan an kum bak baka insawi upat an tum leh si thin a nih hi! Mihring tak hi chu...
Kum hlui thlah: Tleirawl chhuah tirh lai vela kum hlui thlah te kha a va lo nuam mai mai thin em! Star deuh te nei ru ve ran chung khan biak pawh kan be ngam si lo! Thian za ho ti ti khawm naah kan han inhrosa ve a, "Kum hlui thlah zan chu ka tawm fal pui hrim hrim!" kan han ti ve tan tan a, a hun a lo thlen meuh chuan huaisennain a tlin leh lo bakah, hmeichhe tawm fal pui tur chuan a hmeichhia khan a remtih ve loh chuan a theih mai loh tih te chu practical-in kan han zir chhuak chho ve a! Zahzelah tingtang hrui kim lo hmangin Love song kan hriat ang ang pawr fe fein kan han sa ve leh ngawt a! Ni danga zu in ngai hlei lo khan zu in kan han chak ve teh tlat a! U te zarah a nam tawk leka lem tur kan han tawng fuh ve te chuan kum hlui thlah zan chu a tinuam zual a, sikul lama "May I come in sir?" tih bak Saptawnga kawi khat mah tawng thei lo kha he kum hlui thlah zanah na na na hi chuan Saptawng kan va thiam tak em!
Kum hlui ni hnuhnung ber ni tla tur thlir liam te hi thenkhat chuan sakhua tlukin an ngai pawimawh a, kum kal ta chhunga an sualna zawng zawng leh an dawt sawi zawng zawngte kha ni chuan tlakpui se tia duhthusam pahin, a tuk kum thar ni lo chhuak chuan engtin emaw tak thil tha rawn thlen tura beisei chungin mit vai rum rumin ni chu an thlir liam thin a ni mah na! Kei pawh vawi engemaw zat chu hetiang hian ka thlir liam ve tawh a, ka thlir liam urhsun ang huin ka hlawkpui em em awm pawh ka hre hlei law! A thlir dan bik riau keini ang duang man phak loh thil te pawh a awm a ni mahna! Ka hlawkpui vena ber erawh chu Pathian hnena lawmthu sawina hun remchang tak niin ka hria a, chu erawh chu ni tla tur thlir liam kher lo pawhin ka ti mai thin.
Kum thar thutiam (New Year resolutions): Hei mawlh mai hi ka ngai pawimawh ve thin! Zuk leh hmuam bansan te, inkhawm taihmak ve deuh tawh te, sual loh ve deuh tawh te, lehkha zir peih deuh tawh tur tein ka intiam ve fo thin. Kum hlui zanlai dar 12 a han rik chiaha ka sahdah, meizial leh nawalh rel tukverha ka thlawh chhuahtir kum te kha ka theihnghilh thei ngai tawh lo! A tuk kum thar ni tlai lamah a thar ka lei leh vek tih te thleng khan ka la hre reng thin! Kumin kum thar chu Diary ka ziak ve char char tawh ang tiin Diary bu te kan han lei ve a, January ni 1 niah chuan uluk em emin, kan kum thar ruai sa talh zat te nen lam kan han ziak ve thlap a! Kan Star te chungchang pawh ziah zeuh zeuh chak tak chungin thianten kan Diary min lo chhiar ruk sak ang tih hlauin kan ziak tha ngam lo vel! January thla a han ral meuh chuan kan Diary phekah chuan 'pending' a awm ta zeuh zeuh a, March thla vel atang phei chuan chawlhkar tawpah ziak turin kan han thu peih hram a, Thawhtannia kan thil tih kan han ziak tan a, Thawhlehni leh Nilainia kan thil tih chu kan han hriat pawlh leh tlat a, a tawp lamah phei chuan ni khata kan thil tih chu tlar hnih khat lekin kan ziak zo leh ta zung zung mai a ni! Kum chanve a kan liam meuh chuan kan Diary chu a thla a thlain a 'blank' ta thluah mai thin a, a tawp atawpah chuan a pum puiin kan bansan leh nge nge thin! Hetiang vel hi ka nia kei chu...ka 'new year resolution' ve hi chu pa chhe kum tiam ang maiin hlawkpui nan ka la hmang ve hlei thei lo a ni e!
Chuvangin, tun kum thar 2012 chu eng 'resolution' mah ka siam dawn lo tih hi ka ' resolution' chu a ni mai!. Mahni intiam vak vaka tihhlawhtlin leh theih si loh ai chuan, kan thil tih duh chu intiam kher lovin ti mai ila, kan tih duh loh pawh ti lo mai ila...tih hi ka intiamna ni lovin ka thutlukna a ni e!
A ngaihnawm, mitthlaah naupan zual lai min hmuh kir tir leh.
ReplyDeleteNew year resolution ang chi hi kei a tan chuan siam/tih chi miah lovah ka ngai. New year resolution ka siam ve hian, tih tawh loh tur ka tih hi vung takin ka kengkawh (tilo) thin a, ka daih rei ngailo ie. meizial zuk loh. Ngaihtuah lawkna nei lova rilru insiam thutah hian ka tilo hlen thei zawk tlat. :)
Pu HV, thanks. Ka sentiments min tawmpui thiam thin bakah i comments vel hian a tingaihnawm sawt thin. Have a wonderful new year 2012.
ReplyDeleteKumthar hlim leh dam takin i hman theih ka beisei e.
ReplyDeleteA hranpa ngata kumthar thutiam ang hi ka la nei ngai lova, neih ve mai mai chi niin ka hria. Mahnia self-control inzir nan hrim hrim pawh a that ka ring tlat. I blog hmel hmuh a nuam kher mai.
ReplyDelete@caribou, kumthar leh tum thar hi chu a inhmeh hrim hrim. Kan tihlawhtling thei emaw thei lo emaw, hma chu kan sawn nge nge thin. I comment a lawmawm e.
ReplyDelete