Tuesday, September 18, 2012

Tunlai Thil Awmzia - Update!

Khawvel tukverhah dak chhuak leh ang aw! Tunlai thil awmzia hi a hmuhnawm miah miah hle mai! Keini ang thil hre zau lo tak tan pawh kan hriat ve phak chin tlemte pawh hian min tiphâwklêk nge, min tizauthau nge...kan Bible hrilhlawkna thu hi a hringahranin a lo thleng mêk zêl ni berin a lang!

 US President Inthlan: America ram ropuia an President Inthlan pui November thlaa lo awm tur, tunah thla khat awrh chauhin a dan tawh hian khawvêl titî a luah lo thei lo. Tunge tling zâwk ang tia inrinsiak hun a ni a, hei ang ram ropuia President nih tuma chuh phak chinte hi chu an tling emaw, tling lo emaw mi namai lo tak an ni tih hi a chiang pha hrim hrim. Tunlai tak hian an khingpuite chet chhiatna lai chang ranin, remchang melh ran chungin an han inveh vel a, Obama hi tlêmin a bùk a la rit deuh zêl rih em ni chu aw a tih theih. Obama hian President a nih tirh khan America hi a hmel hmang thlak danglam rawih kha a tum rêng a, ("fundamentally change America") tunah hian a hlawhtling thui tawh khawpin a lang. Term hnihna han lal leh chiah se a hmuhnawm ngawt ang.  Pa namai lo leh mi mak tling a ni tlat!

Jerusalem, hnam tinte ruihna no chu!  (Zechariah 12:2) Khawvel hun a hmâwr tawlh tawlh a, khawvel chanchin thar (News) zawng zawng deuh thaw hi Middle East leh Israel chungchang a ni ta mai!  Mak ve tak chu a ni e.  Jerusalem khawpui, Lal Davida khawpui, Israelte Pathianin Ama hming a lo chhalna khawpui chu a vêla hnam hrang hrangte tan "ruihna no" a ni ta tak meuh mai!  Jerusalem vawi te khat mah Koran buah a chuang lo chung pawhin Muslim hote chuan anmahni ta nia chhalin an chuh reng a, Palestinian ho khawpui nih tir tumin an bei reng bawk a, Obama hial pawhin Palestinian ho pek a lo tiam tawh nghe nghe a ni awm e.  Khawvel sawrkar tam ber leh UNO thlengin Jerusalem hi Israelte khawpuiah an pawmpui duh lo va, London Olympic-ah te khan an buai deuh laih phah nghe nghe kha. Mahse, Bible-ah hian chiang takin Jerusalem hi Israelte khawpui a nihzia vawi tam tak a lo tarlang a. Chu mai ni lovin, nakinah Kum Sang Rorel huna Lal Isua ngeiin a pa Davida lalthutphaha thua ro a la relna tur Headquarter a la ni dawn tih hi Bible sawi dan a ni.

Iran Vs Israel boruak: Iranin Nuclear bomb neih ngei tumin a ur vut vut a, "peaceful purpose" a tan chauh a ti thung. Israel hian Iran-in Nuclear bomb a neih chuan an lakah a hmang tak tak duh mai dawnin an hria a, chu chu an tihhlawhtlin hma ngeia an Nuclear siamna hmun te tihchhiatsak a duh si, America tel lo chuan amah mai chuan chhut chhiat sak zawh loh a hlau deuh bakah a sawhkhawk a na dawn tih a hre ve kar bawk si! Chutih laiin Obama hian Israel himna chu kan duh ber a ni e ti reng chungin han inchaltauh tak tak râlah chuan Israel hi  puih  a tum hmel chiah si loh, "diplomatic means"in bei phawt ang a tih chhungin khua a tlai zel si! Iran lah chuan, "Israelin min beih phawt chuan USA tel lo mah se telah kan ngai tho dawn a, a remchang apiangah USA kan do nghal ang" tiin a lo vau ve bawk! Chumai a ni lo, khawvela Oil zawng zawng zaa 40 dawn lai hi Iran ram kiang tuifinriat, "Strait of Hormuz" kaltlanga thawn chhuah an ni a, indo han chhuak chiah se Iran hian heng tuialhthei kal vel hi a dang chat vek dawn tiin a vau bawk a, chu chu khawvelin a huphurh khawp bawk niin a lang.  Chu bakah khawvel sawrkar engemaw zat (India tiamin) hi Iran tuialhthei ringa khawsa an ni bawk si. Russia leh a unaupa China lah chuan Iran an lo an ve mek a, North Korea te thleng thlengin an rawn inrawlh ve ta!
Chuti pawh ni mahse tunah hian Israel hian Iran hi a bei thut duh tho mai awm mang e an ti a. Prime Minister Bejamin Netanyahu pawhin, "Iran laka red line pe thei lo chuan tumahin Iran kan beihna turah hian red light min pe thei lo" a ti ta chheu chheu mai. Chuvangin, tun hnaiah hian British leh US indo lawng rualte chu Persian Gulf lamah an tawlh hnai ta dèl dèl mai le! Engemaw zeuhah Indopui 3-na thleng thei mai niin an ngai ta.

Syria a tlâwm hnai em? Bashar Assad-a hi a tlâwm ang em tih ni lovin engtikahnge a tlâwm ang? tih hi khawvelin a thlir mek. Mahse chuti mai chuan a tlâwm bik dâwn lo a ang khawp mai. Tunlai hian 'Chemical weapon' hmang mai thei turin an inpeih mek a ni awm e. Syria politics hi a buarchuar lutuk a, mi naran chuan tuteng ang ho tih pawh kan hre hlei thei lo a nih hi. US leh Europe ram ten hel ho an anpui mêk laiin Iran, Russia te chuan Assad-a hi an an thung a. Chutih laiin Al-Qaida ho an rawn inrawlh bawk!  Bible chuan Damaska khawpui chu zan khat thilthuah vaivuta a chan tur thu a lo sawi lawk diam tawh! (Isaia 17:1)

A turû chho telh telh dâwn!  I lo thlir zêl teh phawt mai ang hmiang!

6 comments:

  1. A buai mup muo mai a nih hi! A ngaihnawm hle mai

    ReplyDelete
    Replies
    1. Thanks, Pu HV. Nangni phei chuan keini aiin thil engkim hmun leh hmunah in hria a, a chiang duh viau ang chu. America ram lo ropuizia hriatna chu tun thleng hian khawvel chanchin thar khawi hmunah pawh thleng se America hi a tel ve deuh zel mai hian a tichiang khawp mai.

      Delete
  2. Israel chuan a tawpkhawkah chuan midang mitmei veng hauh lo leh thuhnu dawn miah lova 'do or die' tia a beih mai a ngaih ka ring.

    ReplyDelete
    Replies
    1. caribou, i sawi dik mai thei a ni. Obama hi thlan tlin nawn leh a nih phei chuan Israel ho chan chu a chau sawtin ka ring.

      Delete
  3. Kan upa ve tulh tulh a thil kalphung kan chiang telh telh a, ram hruaitute tawngkam leh an khawsa ziate hian beng ati kham thei dawn mai thin

    ReplyDelete
    Replies
    1. Ni e, ti raw Pu HV. A tuate mah hi tha leh fel em em an awm chuang lo. A tawpah chuan mahni hmasial leh nihna duh tak, an thusawi anga nung lem lo vek hi an ni leh tho thin em ni chu aw tih a awl.

      Delete