Tunlai khawvêl kalphung han thlir thuak thuakin leh, a hnial hrât tâwk leka Bible te lo keu ve nial nual tawh si chuan kan thil hmuh leh hriatte hian min tiphâwklêk ve lo thei lo si a nih hi maw! Keini ang mimâwl, Bible hi dik lo thei lova pawm ngut mai, a hre zâwk leh Theology lama zir sâng zawk fê fêten Bible dik tâwk lohna lai an han kawhhmuh ngial pawha hrethiam chuang miah lo, Lal Isua rinna lamah lah mianglo kawi hùm ngheha nghet ve bur mai, "Pathianin a dik a tih chuan a dik a ni mai a lawm" tia puanthuah pu uiaha pêm chûk chûk pawh hnial lo mi; khawvêl thilah chuan miten râwn chu sawi loh huih phai lam lek lek ang hiala an mit sìr relh relh duh tâwk chauh, an dam loh mangan tâwpa ṭawngṭai damna thilpêk nei tûra an beisei leh tlat thung si ang ho hi chu mi khawlhkham tak kan nih loh vêk pawhin mi dangdai tak chu kan ni phawt ang!
Awle, Pu Harold Camping-a te ho angin a ni leh thla te chu bithliah ve thiam lovin, tunlai zâwlnei chhuak thar tam takte angin Mayan Calendar leh Nibiru te chu hre ve sê sû lo mah ila, Zopâ tapchhak zâwl 'theology' zir chhuak ve tawh na fam chuan kan Lalpa'n hun tâwp chhinchhihna Bible-a min lo hrilhte chu an thleng dik mêk zêl tih te hi kan lo hre ve khiau tho mai nia! Chung zinga rilru kap zual tlêm i lo lâwr khâwm ve leh mai mai teh ang:
1. Zirtirna dik lo: Zirtirna dik lote chu hmakhawsâng atâ an lo buaipui tawh a lâwm kan ti a nih pawhin a mawh lo ve. Dik pawh a dik chiah rêng a ni. Amaherawhchu tunlaia zirtirna dik lo lo langsâr thar leh zual nia ka hriat chu: "Isua chauh hi Kawng awmchhun a ni lo. Sakhaw dangte pawhin thudik an hre ve tho va, Pathian an hnenah a inlâr ve tho. Kristiante chauh hi thudik kawltute kan ni bîk lo. Sakhaw dang betute pawh hi pawm tlâng dial dial ang u... " tih hi. Tun hnaia Chrislam sakhua lo chhuak ta te hi a la lian deuh deuh ang tih a rinawm.
2. Same-sex inneih: Khawvel sawrkar hruaitu lawk aṭanga milâr tam tak te, Hollywood leh media tam berin theihtâwpa an thlâwp mêk, Sodom leh Gomorra tlûk chhiatna, neih inang inkawpa inneihna hi a va han kâwlhrâwng sâwt teh lul êm! Tûnah chuan hetiang hi a dik lo tih pawh sawi ngam a har ta! Hetiang nunphung sawisêltute hi khawvêlin mi rilru zîm leh hnawksak tiin min dem lêt vek tawh!
3. Kristian tihduhdahna: A langa pauva tihduhdahna pawh a hluar telh telh bâkah, a lang lo lama tihduhdahna pawh hi a va nasa tawh teh lul êm! Sawrkar dân hmangin emaw, sikul leh pâwl dân hmangin emaw Kristiante hi nêkchêpin kan awm telh telh. Tun hma kum 10 emaw lek kal taa Kristian ram nia chhâl ngam America leh Europe ram tam takah chuan a langa pauva Pathian rin te, Bible chhiar leh ṭawngṭai te chu hnawksakah an ngai a, mite hnêna Pathian thu hrilh chu sawi loh mite tâna a langa ṭawngṭai pawh hmun tam takah chuan an phal tawh lo nia! Damdawi ina damlo ṭawngṭaisak te chu lungin tânna leh thubuai neih phahna hial a lo tling ta! Khawvêlin ISUA hming hi an haw hliah hliah a, ânchhe ṭawngkam atan chauh an hmang ta niin a lang.
4. Khawvêl economic a tlu chhe ruih ruih: A kip a kawi chuan keini ang duang chuan kan hre ve pha lo nâin an thâwm kan lo hre viai viai a! Hmanlaia mi fing leh mi ropui tamna ram Greek hote buaizia leh, anmahni mai ni lovin Europe leh khawvêl pumpui a nghawng mêk dàn te, Greek ho dinhmun ang chiah hi America pawh hian a la tâwk ve thei a ni tia an sawi te hi a dik mai thei. Khawvela khawi ram mah hi sum leh paia buaina nei lo tak tak an awm lo va, nakin lawka pawisa/tangka thuhmun khawvêlin a hman hun tûr leh, an chalah emaw an kut dinglamah emaw chhinchhihna an neih loh chuan lei leh hralh a theih loh hun tûr te hi a hla vak tawh lo mai âwm mang e.
5. Indo leh indo thuthang: Middle East aṭanga ṭanin Indopui pathumna hi engtikah tak chhuak ang maw tiin khawvelin a thlir ṭhup mai! Israel leh Iran inep dân te, Iran hian nuclear bomb a neih veleh Israel nuai chimih vek a tum dan te, Syria buaina reh hlei thei lo te, helai ramah hian engtik lai pawhin indo a chhuak thei reng a ni tih leh indo thulha ṭang leh ṭang an inthliar sa ṭhap tawh dân te hian mut chu a titui tawh meuh lo chu a nih hi!
6. Islam a lian tual tual: President Obama chuan Muslim ho chu ṭanin duhsak viau bawk mah se, amah vang pawh ni chuang lovin Islam sakhua hi a lian tual tual a, 9/11 hnu lam aṭang phei kha chuan khawvêl hian Muslim ho hi an hlauhtlawn emaw tih tûr khawpin an thawm a lian ta. Middle East leh North Africa vêla "Arab Spring" hmanga Islam sakhuain ram tam tak a thunun chhoh mêk dan te hi a mak a sin! Hun hnuhnung indonaa sipai maktaduai 200 Bible-in a sawi hi ṭhenkhat chuan Islamic Army an nih an ring ve bawk. Arab leh Muslim ram tam tak hi Abrahama thlahte an ni ve tlat a, Pathianin mal a sawm a, lian tûr chu an ni ve rêng rêng a ni.
7. Hriatna a pung: Tunlai hmasâwnna ṭhan chakzia leh pun chakzia chu hetia sawi mai sên pawh a ni lo. Mi mâwl ber leh hmun chengker bera chêngte tân pawh hai rual a nih loh hi!
A tlângkawmna: A mi thianghlimte lam tûrin Krista Isua a lo kal hnai tawh hlein a lang. Inpeih rawh le!
Post tha tak a ni. Chhiar a manhla khawp mai.
ReplyDeleteThupuan 22 : 7 ah chuan a lo kal thuai dawn thu a sawi tak kha maw le.
lr, i tilawmawm e. A tlangkawmna khi i chhiar hmaih loh ka beisei! :)
DeleteA ngaihnawmin ka chhiar tui hle mai. Chutih rualin hun tawp a hnaihzia a lang chiang a, inpeih a hunzia chu a lang reng mai.
ReplyDeleteChrislam tih te khi ka vawi khat hriatna a nia, request angrengin, i lo la sawi zau ka beisei. A hming atangin eng emaw chen chu hriat theih ruak mah se.
Middle East khu chu Indopui-IIIna chhuahna hmun tur a ni chiang khawpin ka hria. Kan ram hi kan lo vannei e. Zalen takin Pathian kan be thei a, kan hril thei a, 'kan dal' ti ti mah ila mi ram teh chuan Kristian tha tak ram zawng kan ni chiang e.
Post tha tak a ni a, a lo thlawn mai mai lovang tih ka ring.
This comment has been removed by the author.
DeleteTS, Chrislam chungchang hi hman deuh khan misual.com-ah ka post thuak tawh a, remchangah chipchiar deuh zawkin ka la rawn ziak dawn nia.
DeleteI comment chhiar a nuam ṭhin hle mai. Ka lawm e.
A hun leh a ni, kan Lalpa Isua meuh pawhina a hriat loh kha, thenkhat chuan chiangkuang takin an puang lawk zut zut mai si. Zawlnei der pawh hi, an rahah ngei hian enin teh ila a fuh ber a lo nih hi. Tawpna ni chu a hnai tial tial zel a, chu tawpna ni chu kan damlai hian thleng phak lo pawh ni ila, kan nunna erawh a la tawp dawn tho tho; kumhlun tur reng reng kan awm si lo va. I ziak tha kher mai.
ReplyDeletecaribou, i sawi dik khawp mai. Khawvel tawp hun hmaa mahni tawp tur hi kan la tam viau mai thei e. Inring renga awm hi a finthlak ber mai.
Delete