Thursday, December 15, 2011

Krismas Lunglen

Krismas a hnai tawlh tawlh a, rilruin Bethlehem lam ai mahin kan naupan laia kan chenna thingtlang khaw chengker leh khaw mawngping zet mai kha a chhui kir a, pan lai hun ngaiin lung hlui a leng veng veng mai a nih hi maw!!
Khang hun lai chanchin te kha han ziak dawn ila, khawi atanga tan tur nge tih pawh hriat a har bakah tu khawkhain min hlutpui kher lo ang a, tunlai thangthar zawkte chuan kan sawi awmzia pawh an man pha meuh ang em?  Tlangsam kuhmuh hun atangin  kan urlawk tan tawh a,  a han par tan chiah tawh phei chuan Krismas a hnai tawh a ni tih tuma hrilh kan ngai tawh lo! Sikul chawlh a lo intan a,  rilru thawveng em emin khua han hawi vel ila, ralkhata thlawhhmate chu buhvui hmin tan tawh chuan a ti eng tuk mai a, ral lehlam mual zawng zawng chu Nihawi (Bawngpu pangpar) chuan a bawh eng tuar mai bawk a, serthlum hmin eng tuar mai leh Zawngtah bilhbawlawk lo ther fur tawh mai te chuan thinlung hi a chawk phur mai ni lovin kan helhhawlh a ni ber e!
Sawi zel dawn ila, sawi sen a ni si lo! Krismas lo thleng tur rilrua hisap neuh neuh chunga sava veh te, Thangthleng leh Beai thang kam te,  Tlangsam bawh en te, Khawmhma rah thur tak tak lak te, Krismas thing phurh te, chhang funna tur Changel hnah lak te, chhang dena a mawngkhak inchuh te, Krismas kawr thar te, hmui rep leh ke chat te, halpuah leh baloon te….
Masi sial mawlh kha!  Kan khaw tlangval leh pa ho thenkhatin Krismas hmann tur sial khawchhak lam atanga an han lak/kaih  tum mawlh kha a va hlimawm em! An lo thlen dawn ni chuan kawtchhuahah nunau hovin kan lo hmuak a,  sial pa tuai a sa tui tawk vel tur hi haw-haw chungin an rawn kai ta ruau ruau mai le!    Chutah tlangval ho chuan mipa naupang thenkhat chu an se kaihna hrui hmawrah min han chelh tir ve a, kan va intithei tak em!! Vaivut chhir khu rum rum leh haw-haw chungin khuaah kan han chaih lut a… A sa a tui vak lem loh teh lul nen, a lang ropui ve hrim hrim khan min tiphur a ni awm e!
Khang hun lai te khan khuarei chang tawh mahse, a hun a lo thlen leh meuh hi chuan lunglen a kai tho leh si thin! 
Amah Pu Rokunga pawhin,
“Kum pui sul a lo vei chang hian lunglen a tho leh thin,
Ngai lo leh lawm lo reng hi awm hlei lo;
Kan ngaih Krismas ni eng a lo zam thar leh ta,
A mawi tizuala’n Bethlehem par nen,
A lo vul ta e, par ang kan lawm”,   a lo ti mawlh mawlh reng a nih hi!  A inhmehin a va dik em!
Posted by at

14 comments:

  1. MizohicanDecember 20, 2011 at 7:00 AM

    Welcome back, pu keimah :)

    ReplyDelete
  2. Hriatpuia PaDecember 20, 2011 at 12:20 PM

    Good post.

    Hotupa, ti daih ila, i hla-ho kha a Bu in i siam em kha?

    ReplyDelete
  3. keimahDecember 20, 2011 at 2:04 PM

    Thanks, Sandman! Ka blog bo ka hmu let thei ta ngang si lo va, a phirpui ka siam leh ta ngawt a nih hi! :)

    Zaia, ka lawm e. Kum 10 liam taah khan Armed Veng South KTPin an chhuah a, kha bak kha chu a buin engmah ka la siam lo. Dam chuan zawiin kan la ngaihtuah dawn nia.

    ReplyDelete
  4. H.VangchhiaDecember 21, 2011 at 4:13 AM

    Sawi tum a chiang,ngaihtuahna sawichhuak thiam bawk... tawite pawh ngaihtuahna kalthui theih tir tak a ni tlat mai. Lung a tileng pha tlat. Lungleng, N.Vanlaiphai leh Leng khua vel min mitthla tir alawm le.

    Ka blog a i zawhna kha remchangah tah hian ka chhang mai ang che. Nih ve awm kha mawle :)

    ReplyDelete
  5. keimahDecember 21, 2011 at 2:19 PM

    Pu HV, i comment a lawmawm thin e. Tunlai chu lunglen hun a nih ber hi maw! Krismas vel hi chu naupan lai khan a lo nuam ber ani awm e!

    ReplyDelete
  6. H.VangchhiaDecember 22, 2011 at 9:37 PM

    Ni e, naupan lai, "Dawhthlak" nghahhlelh lai kha alo nuam ber awm e. Tun hnu hi chuan Mizoram ka awm pawhin thingtlang lama hman nuam ka ti ta ber mai. A krismas boruak deuh bik te hian ka hre thin.

    ReplyDelete
  7. keimahDecember 22, 2011 at 10:02 PM

    Dik chiah, Pu HV. Krismas chu thingtlanga hman a nuam ber.

    ReplyDelete
  8. caribouDecember 23, 2011 at 3:14 AM

    I blog bo i hmu let leh thei ta lo chu a pawi ka ti hle mai. I thuziak tawh ho kha i la dahtha anih chuan hetah hian dah lut tha leh la a ni mai alawm. Tun ami hi, a hmasa ami ai khan a mawiin hmuh a nuam zaw maha ka hriat chu le.

    Mahni khua ngeia krismas hman hi chuan lunglenna tur a awm lem lova, chhungte leh thian tha te hmuh phak lohva Zoram pawn lama krismas hman erawh a khawharthlak duhin a lunglenthlak duh vawng vawng hle.

    ReplyDelete
  9. H.VangchhiaDecember 23, 2011 at 8:42 AM

    caribou thurawn min pek atangin ka backup bakah ka print chhuak ta zel a, a zia khawp mai. Bo tur atan chuan ka phal biklo a ni e ka blog fahrah te saw.:)

    ReplyDelete
  10. keimahDecember 24, 2011 at 10:09 PM

    @caribou, ka thu ziak fahrah ve te te ho kha a copy ka lo kawl meuh lo hlawm tlat mai! Duh leh post thar angrengin ka la rawn modify vel ang e.

    Pu HV idea hi zawm ve ka tum tawh ang. Thu ho te te mah ni se a phuah khawm a hautak ve zek zel si a.

    Krismas chibai ule.

    ReplyDelete
  11. AnonymousDecember 25, 2011 at 12:22 AM

    Lung a tileng reuh hle mai a...Pu Keimah chu Mizoram chhim khawthlang lama Krismas kan hman dan te min ngaihtuah chhuah tir alawm mawle...Tunlai hla thar, kutchhuak thar te i nei em? I reh deuh riauva hriatna ka nei deuh

    ReplyDelete
  12. keimahDecember 26, 2011 at 2:40 AM

    @reverie02, Mizoram chhim khawthlang lamah chuan Krismas ka hmang ve tawh thin a lawm! Khang lai vel kha chu ngaihawm danglam ve riau! Ni e, tunlai chu engmah kutchhuak thar kan nei lem lo a nih hi a! Rilruah chuan a la awm ve reng thin a, a hunah chuan Chunglam khian min rawn pe ve leh mai ang chu maw!

    ReplyDelete
  13. AnonymousDecember 29, 2011 at 10:38 PM

    Pu Keimah-a thu leh hla hi chu ka hmaih phal thlawt lo chu a lo ni e.
    @ Thingtlang tlangval hian i rawn ziah chhuah ang khi ka tawng ve vek mai. Lung a tileng tak zet zet.

    -CFL

    ReplyDelete
  14. keimahJanuary 1, 2012 at 5:10 PM

    I va tilawmawm em CFL! Ni e tiraw, thingtlang naupang nun kha kei pawh ka ngai tawp thei lo a ni e. Mumang lamah nen lam khaw hlui kan la fang zak zak zel thin a nih hi maw!

    ReplyDelete

Subscribe to: Post Comments (Atom)